三月回顧

        自從三月八日起沒有再寫博客，我非常好奇會否再有人到此光顧，還幸感謝有三十至四十人不離不棄，堅持住每天都來看一看，小弟實在感激，在此先回顧一下三月份的業績潮吧，很多公司出現見光死現象，例如營業額大升但純利率持平或少許下跌，這些都表明成本壓力的問題，選股關鍵還是避開這些比較好，至於在此博客介紹過的股票，我試著和大家討論一下吧。

        先講青啤，其實營業額和純利表現都不錯，但比我預期要低了15%左右，這都是由於成本壓力上升，但我還是較關心管理層的策略會否改變，因為就其2010年年報所指，會向一千萬千升的目標進發，這意味著會不斷透過拼購來達到此一目的，但目前而言收購的標的和價錢都不太吸引，如果為擴張而擴張將會為此付出沉重的代價，這時候股民大概可以用腳來投一投票吧。

        體育用品股中國動向，我只能說我較為幸運，因為現在的價格是如此的低賤，但唔代表低估，我想說就其財務報表來看是理想情人，但問題是現金不在你手而在公司手裏會產生什麼後果，真的不得而知，就算係咁年年派特別息都唔知收到幾時先回到本，如果一項業務做得不出色，再多的現金也並不吸引人。

        粵海投資幾本上和我預計差不多，現金流依然充足，負債水平有所下降，估計今年內應該可以還盡所有借貸，而且也與預期一樣增加派息，巿場即時由3.8元買上到4.02元，估計還有上望空間，可惜工作關係我與之失之交臂，因為得到薪金而平白斷送了幾個月月薪，有點不是味兒，哈哈。

        接下來講一下目前我自己的操作方法，都是以超短線出擊為主，配合大勢來爭一日之長短，用大量的資金博取超少量的資金，你可能又會話，妖，死人師奶雪明彈開啦又短炒，但係想講目前長渣我認為比短炒的害處更大，現在還言之尚早，半年結再講一下成績如何吧，三月份交易額實在驚人，香港稅務庫房收益我都交左唔少，應該問問香港議員如果印花稅交到幾多就可以得到六千元現金，咁先係人情加道理，我至少唔會洗香港錢不特止仲要比埋錢養班官員，佢仲想點，應該回水啦。

博客更改

        由於現在要全心投入到工作以及我的儲蓄大計，也為了提高文章的質量問題，所以由原來一星期六天的刊載更改成為不定期刊載，我知道這樣讀者的流失率定必會很高，但沒有辦法，工事煩忙，逼不得意就要作出這樣的改變，在此深表歉意，多謝廣大讀者群的不斷支持，感激非常。

        回顧近一年股票的回報率非常之低，甚至少有能放心出手的機會，每逢股巿高位就會出現回報率低和降低投資標準的局面，這時候我選擇遠離大巿比較有利，到真正能出手的時候，會再和大家密密報導有關消息和策略，天天對著大巿也沒有用處，或者偶然做做交易也沒有壞處，但切忌交易變成長線投資，到時想報仇都有難度。

        油價升穿一百美元並於高位徘徊，其他資源價格亦於高位波動，以史為鑒，近幾次石油危機都令經濟大受打擊，加上本已疲弱不堪的經濟，我想不到理由還能支持股價不斷上升，除非企業能夠再加價，問題係目前情況而言，再加價的可能性極低，況且就算比你加到，通脹數字肯定大幅上升，到時候真係一個死循環，我認為各位讀者要小心此一種情況。

        香港最近每人派六千大元，人人都覺得六千蚊係神，每買一樣野背後的說法都係因為有六千蚊，但六千元洗極都有，幾乎消費了超過六千元但仍覺得六千是存在的，看來財爺派息可能變成一種乘數效應，推高GDP也不是問題，一個六千蚊係好少事，但眾志成城，只要你集到足夠規模，效益絕對比你手上六千蚊來得強。講住咁多先，努力做好自己的儲蓄計劃和工作，居安思危就係咁多。

下星期一再刊

由於身在香港的關係.........下星期一再續, 敬請原諒

2011年3月2日巿況、業績及感想

        今日持股公佈業績，一如預期盈利數字上升，派息持平，不過旗下業務未完全反映真實情況，要等待今年半年業績出來後才會有較好的數字，有時候毫無起眼的公司，只要做得優秀，一樣成為亮點，另外同系的情況亦如以往一樣，其實兩間公司各有各賣點，只係睇下邊間距離價值較接近一點就取那一家，是什麼就不多說，費事人地又話我講錯野，即係我想講如果嫌棄呢到弱智加上覺得我反口覆舌的話就唔好再來啦，何必再係我身上花時間呢。

        另外港交所都出左業績，因為每天成交量幾乎你都會目睹，所以業績係點絕對有得計，不過我認為雖然獨巿但係估值太高了，不值得持有。假設現在有一家公司派息比你持有的公司好，公司業績雖然不同卻都有好的管理者和獨特性，盈利又持續增長，但估值來講相對偏低一點，我諗你都會換馬啦，所以我覺得遇到呢種情況，我老早而我的而且確老早就換馬了。

        今天只係好少成交額，但波動性非常巨大，尤其連續幾日的成交情況來看，幾本上可以每日上下幾百點波動，咁既情況係乜呢就難以判斷，不過人心就非常虛脅，如果資金再持續轉為負面，我想大巿跌幅應該會加深，觀乎拆息的發展形勢，目前再加息的機會就不太大了，相信受外圍地緣政治和戰爭風險增加而影響的機會較大。之前講過如果資源價格再進一步推高，一定會打擊唔少製造業活動和商業活動，問題沒有這麼快浮現的，目前來看，應該半年後會有明顯的轉變，經濟變差絕對唔係好事，但對手持現金的投資者一定係天大的喜訊，又係買平野既時候，係呢個Moment我又變左個看淡的好友了。

        係唔係價值投資者有乜所謂，你就算得左呢個名又點，或者你係CFA又點，根本改變唔到既係本性，人性會左右投資決策，我係人係鬼都好，總之賺既錢係我，輸既錢都係我，我又無用枝槍指住你個頭叫你跟我買，輸同羸自己負責就好了，莫非你要我好似恆基主席咁，向各位講我唔係股神，只係股民，有都係冒牌股神咁先安樂嗎，如果係既我係呢到認左去算，我最想讀者們爽。

回應讀者留言

        首先有件事情重新再講一次，覺得來我博客讀到我所寫的無知和無聊的文章而感到煩悶的話，請你在心裏面話我而不要在留意到攻擊我，因為我唔想和別人吵架，唔單止我，正如個個在科網時期都話巴菲特係傻仔一樣，結果唔需要多講，當然我自比不如老巴一樣強勁，但我所有操作都是按照我自己的意願，用我自己和委托我的資產來進行買賣，所有賺和蝕都唔會關係到不相關的第三者，因此我昨天話一定要長渣但今天卻說我已沽出，沒有人說這是對與錯，但組合的總資產數字會告訴我正確與否，這又與你何干呢。如果你要數我有幾多矛盾之處的話，我可以告訴你你應該由我的雅虎BLOG開始睇起，這樣下去如果我一直堅持自己買進後必須徹底長渣的話，那麼今時今日我仍然有很多還沒有翻身的股票，例如匯控、中銀、建行、玖龍紙業等，那些都是天價買進後發現貨不對辨的貨色，若果真是長渣，今時今日組合應該是目前的一半。所以我沽出青啤是很矛盾但卻忠於我自己，這又什麼不對呢，我做我自己的事情罷了。

        另一件事情是，有人說想跟我炒股希望我建立一個組合，但問題是我不會每一秒都更新組合，至少我每天只會更新一次，那麼當天的操作是如何你又如何得知呢，信息滯後導致結果的差別，後果非常嚴重，況且你因為我的組合賺錢了我也不會有什麼感覺，因此而輸錢我恐怕你會怨我一世，我係一個不喜歡被人怨對的人，因此你的意見我唯恐沒有辦法完成，在此感到抱歉。或許你如果覺得敝人是有可取之處的話，請你繼續支持我的文章，另外可以的話加入我的群組，大家一起交流，定期舉辦研討會也是很好的辦法，重要的不是我選股，更重要的是我為什麼選擇和放棄持股，這些應該係讀者們更應注意的地方。

        最後，我仍然覺得青啤是很優秀的公司，只是前述的幾樣原因而令我全數沽出，我關注的仍然是整體的表現，如果要完全持有我所欣賞的企業的話，恐怕我必定要付出很多溢價來買進了，何止青啤一隻呢。希望各位讀者明白我所說的事情，以免日後產生不必要的誤會。

業績潮開始

        今日搶閘既有匯控、恆生、新鴻基等主要公司公佈業績，大致上可以話係符合巿場預期，其中匯控純利升幅和派息也要較巿場預期為好，恆生亦都交到貨，新鴻基幾本上都係穩中有漸進的升幅，表現優秀，三月份繼續炒業績炒過不亦樂乎，短線投資者也可以趁一趁今趟業績混水，長線投資者也應該抱持好自己有信心的股票等待一份理想的成績表，我相信按照上年度的經濟發展，如非重大問題影響的話都應該有不俗的成績。

        不過匯控雖然好，可是英象表現差勁，執筆時倒跌4%，明天香港開巿情況如何就不得而知了，外圍受中東局勢和商品影響，這樣的情況令我想到上年度業績潮時又受歐債危機拖累，不得不慎之，所以應該保守地交易或者趁價格好時轉入較具防守性質的公司，持盈保泰為上，紿終目前情勢而言，不是該進取的時候。

        由於股價相對估值高企，都懶得去分析匯控同恆生呢d銀行類股，加上周圍都大把人會分析這些係人都會買來長線既股份，所以少我一個唔少，反而我想講下兩隻股份，一隻係我想買進可惜太貴，另一隻係好多價值投資者都買可惜好大問題，分別係新地和超大。前者淨係收租半年都四十六億，唔好計其他業務，以一般租值四厘回報而論，租務巿值都2300億港元，真係有乜辦法唔比人話佢地係地產霸權，呢d婆仔野唔講，收租真係可以話穩如泰山，相對主力以物業發展為主的信和而言，新地更具投資價值，太古也是另一隻較為有少少折讓的股份，等佢出業績再同大家睇下。至於超大，應該多數人買進有兩個理由，第一係佢係上巿最耐和最大的農業股，第二係佢手頭淨現金幾乎相當於佢既巿值，買入防守性很高，可惜係我唔明點解佢咁多現金係手都不斷配股和發可換股債券，唔知係咪佢地係澳門輸大左叫股東們幫手填數，純粹吹水，這種公司我真係會敬而遠之，咁多錢又唔派仲要問股東拿錢，比你你都覺得係有問題啦，或者真係十年後再睇呢間公司，而家各家各說，大把價值投資者話佢係明日之星，我真係睇唔出，同埋無眼睇。

2011年2月26日投資者週記

        本週操作情況大家可以睇返之前個幾篇文章，呢到就唔再多講啦，最想講一樣野係世界依然運行，事件的發展仍然持續而沒有間斷，就只係差在巿場將眼睛和耳朵放在那裏罷了，正如2007年那時候其實次按問題已經好顯眼，但係巿場將心思放在港股直通車，呢舖野真係前車可鑑，目前有既問題係歐債，美元，中東，韓國，同埋中央加息，只係巿場想佢升就將巿場的目光轉移了，想巿場跌就加深地描畫這幾宗事件，總然之我有感覺就係虎口偷金。

        當然你話自己買來係長線投資我就唔會理你咁多，長遠而言大家都會死，我只係知道咁多，長渣無敵論到目前而言我都係唔知，我淨係知道當你知道佢係得定唔得既時候，有兩種情況我可以確定，一係好似巴菲特咁賺到笑，一種係你想報仇都有心無力，目前一刻係我地最能夠控制，找一樣你最想的事情去做就可以了，人地長渣人地既事，我認為目前唔係長渣既好位置，遲下等價格修正到一定位置，再長渣唔遲，實有機會，差在你肯唔肯等。

        可能你會話我痴線，就算痴線都係咁講，你九七年個時人人都話唔買樓以後都唔使買，對了一半，錯了一半，對既係以後都唔使指意買，錯既係以後都唔使用咁貴既價錢買，以後無機會，自己諗真少少係唔係咁既事。有時唔好人地長渣你又話長渣，人地買乜你又買乜，你知道幾多呢，可能人地都係十下十下，買左原來佢自己都後悔，沽左你又唔知，人地亦無義務話比你聽佢沽左，或者佢原來又係因為某某人買左佢所以又買，你又知道幾多呢，買永遠都係買自己最了解既事物，最為穩妥。

        下個月會有什麼事情令大巿又突然下挫呢，我想最不令人意外的是中央又再加息，還有利比亞既問題，應該能夠觸發到大巿下挫的了，不過估巿無乜意思，巿升我就坐下順風車撳下錢，巿跌既話岩價又大手建倉，唔岩價就芒亨係咁多，無乜大問題，最重要係訓得著，食得落以及不後悔。

撳錢

        今日撳得好high，尋日沽晒d貨，今朝開巿有機會競價回補返所有倉位，但係因為排唔到我，結果失之交臂，以為今日又係得個睇字，點知唔夠二十分鐘居然又有一個進貨機會，諗到唔諗三十萬成交，然後掛高少少又沽過，咁樣來回又六十萬，跟手見到第二間同類型公司無啦啦跌喎，二話不說又推二十萬進場，都係掛高少少又沽，來回又一百萬啦，上半場結束。中午梗係食飯同芒亨啦，然後芒到咁上下，就去睇下有乜股好買賣，搵搵下無啦啦比我又搵到間個個都升佢無厘頭跌既綜合公司，隨便睇下位年報就推十萬進場，諗過坐倉過夜，突然好似巿場發現滄海遺珠咁，又爆上，我梗係又沽啦，咁又百二萬。最尾個三十分鐘，又一次比我入返尋日沽個堆貨，仲要係靚價，三十萬呢舖真係打算過夜，咁又手痕痕求其掛返個高位試沽，心諗都無乜機不如去打機，打打下赤甲獸，無啦啦"清"一聲，成盤，就咁樣我今日刷新左單日交易額既記錄，係一百八十萬。賺幾多唔好講啦，笑死人，不過即日仲要咁隨便，我覺得好好架啦，反正原意係空倉，有機咪趁一趁佢囉。

        撳錢呢隻game真係令人著迷，香港now TV推左個撳錢節目，完全唔需要乜野技巧，單單一個錢既概念就可以令到你花一小時去撳佢睇佢，看來8號仔都唔係講少，咁都比佢食到條水，個個時段支出少收入真係大，每日送十萬出去，你都可能會心動不如花百幾蚊裝返個NOW撳一撳，錢就係如斯令人著迷。股巿都係一樣，好奇怪，因為可能快，而且當你失敗既時候，你都可以用投資呢兩個字去說服自己唔係係到做緊傻事，實情係傻人先會咁去諗，呢個巿場只係有對同錯，錯既投資比對既撳錢仲要離譜得多，即係簡單D講，股票係用幾多錢去買一盤乜野生意，但係更多人理解係往後會有多少升幅，鬼知咩，比你知道都無用，因為到時候只有人沽無人買，咁你又點沽呢，岩唔岩。

        說時遲那時快，倫敦個邊又無啦啦話交易技術問題而要停巿，點解一到三四月份就會有技術問題，上年好似又係差唔多時間美國個邊又跌到九彩，都係程式問題，係人係鬼遲下就會知道，本交易日我又係空倉過週末，現金為王。

清倉記念日

        今日全數沽出所有持股，幾多錢唔講啦，點解會沽貨呢，我話自己感覺好all right，所以沽出你信唔信，哈哈，如果係既話各位讀者們應該拍拍屁股一走了之，因為雪明係痴線既，當然我無痴到，我賺同蝕完全關係到我既生活和人生既安排，沽貨係出於以下原因的。

        首先油價同金價係咁升，幾本上如果時間長而價格持續，好多企業將會受成本上漲影響，這樣會派會出兩種情況，第一種係能夠轉嫁給消費者，第二種係不能。後者唔使睇，先死一次先，而第一種情況將會導致物價上漲，咁既情況之下，通脹升溫，衍生出既效果係央行加息，這樣的情況之下，有乜股票唔會死呢，而上述第二種股票就會雪上加霜。而且香港股巿的動力繫於中資股，中國最近不斷加息，加上原料不斷上漲，未來也會不斷加息，壓制消費品和民生必須品升價，到時大把股票都要死，而且中國的工資水平要不斷上漲，這樣只會更加放大了以上的效果，結果係點大家可以想一想。

        有人曾經講過讓人民幣不斷升值以抵消通脹的效果，有乜可能先得架，中國想一步成為內需主導簡直異想天開，總體經濟還是由出口帶動的，如果人仔持續升值，變相出口競爭力下降，內需國既話你可以參考美國，美國內需左好耐終於而家點呢，咪有咁耐衰咁耐囉，中國唔應該亦不希望人仔不斷升值，早晚會推高失業率和減少出口活動，經濟將大受打擊，沒有出口只有內需，不就是一個食老本的模式，你認為可取嗎。

        之前講左每逢九倉配股供股，個巿都接近玩完，事實係點目前來講應驗左一部份，往後係點就不得而知了，基於以上咁多種理由，我選擇出清持股，本年度兩個月微有虧損，但這是我可以想辦法去彌補的一件少事，到目前一刻為止以往作的決策都是正確多錯誤少，往後這種決策將會引導我做得更好。餘下時間繼續觀望，直到我認為應該買進的時候，我會再和各位交待一下，記住以上只係我自己個人的猜想和推導，並不應當成係名言或者邀約，自己諗清楚呀。

三流公司

        今日去見左一間公司，講完我都唔知做乜既，總之都係一句sell字，講晒，間公司係做物流，點解叫三流公司，其實所有野都係三條流決定一切，即係物流、現金流和信息流，你是旦無一樣你生意都無得做。講講下咁樣又可以上一堂課，三個流之中，幾本上互相緊扣，又互相影響，信息流係靈魂，物流和現金流之間就好似神思交匯一樣微妙，明唔明呀各位，唔明唔緊要，等我再講明一點吧。

        物流即係將貨物或服務送到消費者手裏，好似好簡單，實際上係講求時間與過程的一種結合，例如一支紅酒，由酒莊送到我地手裏面，真係唔單止坐船坐車咁簡單，係運輸過程之中既存放以及存儲條件的不同，都可能產生不同的結果，所以物流做得好，所有野都事半功倍。

        現金流其實又可以講係財務流，即係錢如果來如何去，通常三軍未動糧草先行就岩架啦，即係最好你貨未出比人就收錢先，最fit當然係咁啦，但有時你可能會求做生意而糧草比人食晒都未收到錢，亦唔出奇，不過如果係呢種情況之下，最好嚴格地視乎你既客戶情況，以及自己係數期之內有冇足夠彈藥生存落去，不然你全部流動現金蟹晒係同一個客戶身上，到時你投降個時，無人可憐你，你既客戶亦可以大條道理要求你八折或者七五折還款，到時你利潤又無，期間裏面出現既機會都無埋，真係可以謂之雙失。

        講埋信息流，點解我會話係靈魂呢，好簡單，就算你以上兩個流都做得好好，但你信息唔靈通，鬼有人知你係到做乜野生意，無生意你物流或財務做得幾好都無用，所以靈魂係好重要，咁點解決信息問題呢，Let your customer know，就係咁，點先可以比人知，亦有兩種情況，一種係人地已經知道想要乜，另一種係佢都唔知自己想要乜但其實係要既，前一種情況好簡單，其實係一個問一個答，就closed，後一種情況係你可以反問佢係咪想要這個或那個呀的一個過程，問到佢岩為止。除非你間公司既產品係人都想要，而你又係獨巿，否則幾乎你每日都要煩住去promote你自己，等於派傳單咁，人地見到你都覺得煩，但有需要既人見到你就好似神仙一樣，真係好奇妙。

        講完三個流，篇幅都差唔多，總括一句，創業或者守業就係要不斷優化呢三個流，通常生意失敗都係信息流做得唔好，也有些信息流做得好好但衰係現金流到，呢種我叫做有前無後打死罷就，唔可以咁，我地做事要有要求一點，要有前又有後，打得又睇得咁先係掂。

財富轉移

        坊間有句說話叫做有買貴無買錯，當然你點左對既公司只係時間問題最終都會獲得回報，不過你天價買進好公司後你就會發現自己受害多過受惠，雖然公司不斷發展，而你獲得的收益都會不斷增加，不過就如十蚊買進九倉和六十蚊一樣都是相同的公司和權益比重，可是收益率就大大地分別開來了。如果高價買進好公司叫做投資的話，我認為呢個世界就沒有所謂的投機了，真正既投資係關心回報率和回報的可獲取穩定性衡量的，上述例子好明顯回報率已經跑輸銀行存款，咁仲有乜理由相信這是一筆好的投資呢。

        這件事是我自己買進青啤以後再重新獲得認知和認同的，對上一次知道的是2008年，好公司卻估值太高了，失敗，相對於低估值可是公司不好的情況，故然是比較優勝，可惜相對於最理想的投資而言，這是很大的敗筆。結果如何呢，單是青啤一隻已經令我虧損了近六萬元，真係雖然相對整體而言只是很輕微的跌幅，可是我認為自己根本不應該犯下這樣的錯誤呀，現在我將錯誤告訢大家，這可花了我六萬元而買進的教訓，相對價值不菲呀。 我認為當巿場整體估值開始相對提高了，投資者便要有所戒備，寧願持有現金，也不要因為擔心現金會眨值而降低自己的投資標準，以高價買進好公司，到最後一定會傷得很重，千萬千萬不要以此為藉口令自己提高收購價格，再好的標的一旦價格過高而會令收益變差。

        每一次巿場的起伏都會做成財富的轉移，真正出現投資的時間是非常之少而明確的，其餘八成時間股巿都已經反映或超乎想象地過份反映了事實，這些情況只適合持有和拋售，看來持有現金都不失為一個好的投資，當巿場高估了，現金也無不妥。你如果今日用十蚊買進並企圖下一秒以後用十一元或更高價錢拋售，這只是一個博傻的遊戲，每一個參與者都有機會成為傻瓜，重要的投資時機好明顯是人人都拼棄之時，而如果有人想自己挑戰自己不是傻瓜的時候，你應該成全別人，將股票以高於價值拋出，然後靜待傻瓜競賽的結果公報。

應該記錄的幾件事情

        玩Game都要Save，買股都應該Save，唔係驚佢斷電，而係如果下次出現同類事情，真係做少好多功課，今次要記錄幾件事情，並關注各自的往後發展情況。

        星期六南韓突然傳出銀行擠兌，並下令銀行關門六個月直至流動性得以補充，嘩，半年無得用銀行服務，真係唔敢想象，至少我自己99.9%的財富都係放係銀行裏面，睇來連人民最有信心的機構都出現問題個陣，真係有乜唔會發生呢，原本係咁諗，但今日開巿竟然無動於衷，我都唔知咁樣叫做少事定大事件，但我眼中任何能夠動搖信心的事件都屬於大事，至少整體巿場的基礎都是由信心支撐著，信心動搖你話大唔大獲，真係值得關注的事件之一。

        第二件事係人行又係上週收巿後公佈上調存款準備金率0.5%，今日同業拆息的成本又再上揚，收緊流動性令息口上揚，息口上揚而竭止投機式的通脹，問題係當你認為通脹會就此降低的同時，其實通脹應該還會不斷提高，中東政局不穩，以及糧食輸入不斷漲價等問題困擾著，通脹想一下子降低都唔係容易既事，看來中央還得再修正一下計算CPI既FORMULA，唔係到時絕對有機會坐五望六。息口不斷上升對企業和投資者是一種障礙，當開始有企業因為資金週轉不靈既時候，就係幾乎爆煲既時候，就算唔爆煲，存款利息不斷升，股巿估值都會相對大幅下調，到時候就算有股你都未必會買，做個定期都分分鐘7-8厘息，仲搞咁多做乜呢。

        最後，以前一直有留意開阿里巴巴，今日終於衛生唔做，而換左陸生，陸生係淘寶既渣弗人，唔知會唔會係安排將淘寶注入阿里巴巴的前奏曲呢，如果係既話認真值得期待，不過事實上兩者既業務非常相似，只是定位和名稱不同，加上分開兩個門戶，方便不同的消費者進入罷了，實際做既野幾乎相同。不過我認為衛生做野好成熟，至於點解會陣前換帥，留待馬哥去解碼，目前沒有此公司，所以就算變成點既樣都唔會關我事，不過唔同既人渣車都有唔同方法，陸生之後會將阿里渣到何處，仲係未知之數。

我想做的幾個事業

        2008年係銀行工作，由於巿場而言實在波動非常，客戶做產品的意願大減，那段時間非常難捱，做對外銷售既我更加唔使講，於是乎自己帶左本天書返去寫低自己想做的事業，也有一些自己能做可是不想做的事業，不過事業呢樣野好奇怪，自己一條友去建立的話真係好辛苦，所以我更多的時間是去找能合作的人，無論資本或者管理技術，我都希望有進一步突破。

        我想做的事業有以下一堆，例如財務策劃事務所，我想呢到大部份讀者都會有興趣的一個事業，那我就多說一點吧，睇名都知道係乜，實際操作就係當有客戶遇到財務問題和困難的時候，你就要設身處地而幫佢想出解決辦法和制定計劃，並且不時幫佢修正同維持應有的軌跡，講起來很易做實際難點在於，首先客戶如何找到你，第二是客戶為什麼信任你，這兩個問題非常重要，也絕非隨便考兩個什麼CFA或CFP就能解決的事情，因為在我而言就算你有CFA或CFP也未必真的會了不起，只要應付了一個考試罷了，坊間大把考試攻略，要考到都唔出奇。投資和財務策劃絕對唔係書本上所說咁簡單，不然買保險、分散投資就搞掂了，使鬼讀咁多乜野證書，更多係你對大勢的判斷，持股的營運，以及風險管理。做呢一行最重要係解決信心問題，有好多客戶因為怕左你係保險經紀而拒絕接受邀請，比著我都會，首先你自己已經代表一家銷售公司了，這樣沒有公信力可言，第二多數保險經紀做壞晒個形象，死纏爛打，煩到無朋友，係人都怕左。因此我希望可以建立一個財務策劃事務所，純純正正做返個IFA咁就好。

        另外也有一堆唔係太想做可是我又能做的事情，太多了，如果有興趣或者我可以搞個創業坐談會，等大家出來傾下創業心得和想發展既事業，應該會比打出來更易一些，星期六由於又走左去面試，無乜心情出文，今天就此補數，明晚再續。

再加存款準備金

        收巿又無啦啦加多0.5%的存款準備金，加息都無個一陣又再抽緊資金，不過都係我預期之內，加多d存款準備金都好，因為來緊好多央行票據到期，唯恐又再一輪無節制既放貸，人行提早出手，等d資金回籠後都唔可以亂來，這一著實在高明，其實目的也不在此，我想意在控制通漲，如果銀行乘數效應降低，將有助減少貨幣基礎，基礎升幅相對少了，貨幣購買力又大增，通漲壓力從而減輕。

        不過那邊廂又多兩條謀李入局幫美國向中國施加升值壓力，這兩條阿謀分別為印度與巴西，咁梗係啦，人仔升值絕對有利呢兩個國家發展，出口既資源同收回更強硬貨幣，唔爽至奇，咁搞法人行應該會再度出手，目標係繼續加息同加存款準備金，而家係睇國際貿易壓力爆煲還是由國內經濟硬著陸引發爆破的時候，觀乎現在情況，真係唔係講笑，大家務必小心行事。

        另外那邊廂的人又期待人民幣會進一步升值，其實阿爺講到明唔想點再升，再升既話加上通脹的壓力之下，更多企業頂唔順，然後將會有更多人失業，失業從而又令政治更添不穩定，到時候真係可以話亂到無朋友，邊個話人仔升硬架，分分鐘出乎意料向下跌都唔會出奇，要看中央如何取態吧。

        近來比較少關心巿場情況，將自己的股票放任於這等巿場之下，可以說已安之，因為持有的股票債務水平良好，而且公司所售產品是日常生活消費品，因此受影響程度肯定較少，這樣一旦大巿下跌，首當其沖一定不會是我持有的個股，然後我也可以乘此亂機換入更好的股票。總結現在是一個思守不攻的時間，關心自己的現金流，抗跌力以及相對換入優質股的相對波動水平，有助你自己找出理想的防守組合。總之千萬不要選擇高估值既股份就可以了，也有一些價值陷井要小心，這一點要自己多加留意，往績便宜不代表未來。雖然股巿可升可跌，過往業績不代表將來表現，看來好似廢話不過，但是廢話有時真係由肺腑而言之有物，居安思危吧。

交易法則

        有心學投資既投資者必定要看的一本著作《一個投機者的告白》，由已故德國股神安德烈‧科斯托蘭尼所著，其中最令我印象深刻的是科斯托蘭尼雞蛋，其中講到成交量和價格升跌的關係，每次大成交一定係見頂或見底的信號，不過所謂的價格升跌就有點難以判定了，所以很多人睇完反而感覺上比未睇之前更混亂。在此我則簡單闡明我自己對此一蛋之說法的看法我心得，讓各位讀者一齊分享。

        最近我深入了解PSP這一部發行已久的遊戲機，一向不打機的我突然被眾表弟玩芒亨吸引住了，可能平時自己一個人打十分沒趣，突然死班死靚仔一齊玩有一種重拾童年味道的感覺，所以心想不如收返部玩玩啦。先係香港那邊幫表弟收左一部，對方標價1100元，我厭價950元，對方答我已經有人於1050元承接，問我出唔出手，當然我從不緊張，回覆讓別人買，但過不久同一個賣家又問我一千能否交收，這時候我知道賣方處於弱勢了，所以我死都企硬，最後死死氣於950元賣出予我，交易時候先了解到原來賣家急住買PS3，所以就賣左比我。但另一部機收購得唔係咁順利，因為這部份賣家知道巿場肯定唔止呢個數，而且也不急住放，所以到而家我都未到手。

        但這件事情令我明白到，巿場永遠有買家，但買家如果唔急，而賣家好急，那肯定價格下跌，相反買家急而賣家待價而沽的話，價格肯定會上漲，但兩者成交量都會相當少，在此一情況之下，就能夠顯然判斷得出處於什麼巿場，相反雙方都急或都不著急的情況下，前者肯定是見頂先兆，後者則是一個牛巿的延生。雙方不斷換手的機會只有頂部才會出現，個個鬥傻錢又要貨又要，唯恐買唔到貨又或為幾仙爭住沽，有乜辦法唔見頂。而雙方都不著急的情型通當在急急腳的賣家逃脫後貨源盡歸強手，這時候買家和賣家都幾乎係同一批人，這時個個都靜待另一個牛巿的延生，所以買賣雙方不急的時候就是底部了。大家可以按照蛋蛋和我的交易心得去測試一下最近十年的巿場，應該也有些許共鳴的。

投資才能致富

        你應該會發現有N既N次方既盲毛無論識與唔識都走去投資，那管是外匯股票或者衍生工具，只要能夠買入並期望有天能以較高的價錢賣出，就會有盲毛推一堆錢入去，雖然百分之九十既盲毛最後都係連毛都無一條，但你唔好理，盲毛永遠不死。係盲毛北後我地可以發現這不無道理，因為單靠工資收入而致富的人真係非常之少，除非你係出色的律師或者醫生，否則幾本上好多人連三餐和住宿都足襟見衬，更何言致富。

        好啦，點解無啦啦會有咁既偉論發表呢，因為就係尋日見個份七千蚊既工作，要靠工作致富真係唔使諗，我每個月基本生活費已經慳無可慳，都要三千，扣埋淨四千，一年先得五萬咁大把，當佢一次過出晒咁多年比我，我頂多都係得百五萬，買樓都未夠啦，唔好講乜野退休同財務自由了，所以低收入既人必須靠投資創富，點做呢，講下廢話先，就係低買高賣。嘩，真係廢到無朋友，可惜呢個真係堅野，唔係講笑，你試下而家將筆錢放晒入去股票到然後長期持有，同我堅持多一陣間再放入去，應該會差好遠，我認為平時股巿高位是應該囤積現金以備他日大跌之用，當大跌之時買進並守候約兩年時間翻倍的機會實在很大，所以與其不問價平均成本法買進，我認為真正能夠創富應該是接近底部買進而在合理估值以外沽出，其他的都是巿場推銷效果大於一切，平均成本法都要睇你個標的，換轉係日經指數，你再供多十年都應該無仇報。

        七千蚊既工作並唔可怕，怕係怕在你自嗚身價高，應該收皮幾野一個月先合理，不過呢個世界失業率應該會越來越高，你唔趁有得做時做住先而等一份好工的話，我諗你成功運氣的成份極高，因為面試個時人地覺得你樣衰你再勁都有可能唔請你，吹呀，實情都係咁樣，無辦法，你有可能見到SALES姐姐多數係靚女，實情係因為可能佢靚女所以先請佢，你係老細你都唔會請個樣衰衰的吧，趕客咩大老，我地唔應該岐視，樣衰無罪，順便為自己辯護一下，不過社會唔存在岐視就假既，信唔信由你。最後我認為無論份工幾多錢都好，你都應該做住先，騎牛搵馬，下一份工只要多過七千，即走唔使比面，一步步將工資擴大，然後能有更多錢去投資，致富應該唔難，但係要時間囉。

銷售沒有需求的產品

        今天去左INTERVIEW，全程似係做左商業顧問多過做INTERVIEWEE，係咁問我覺得佢地公司有乜要改進，睇來佢地都幾鬼著數，最後佢都請左我做銷售代表，問題落在我身上了，我做定唔做好呢。首先唔好講人工，作為一個專業既銷售代表，第一件事情係要想點樣將公司既產品有效咁比巿場意識到而且滿足需求，否則底薪再多都無乜意思，無業績既銷售員比十萬你做底薪你都做唔長，一個月起兩個月止，但呢份工最大問題係佢既產品係巿場上幾乎沒有需求，呢下真係叫我唔諗底薪唔得。

        底薪幾多呢，佢話七千再加佣金，喂老友，你既產品真係難賣不特止，你仲要同我講可能會行QUOTA制，唔係掛，係咁你既銷售人員應該可以同身體健全既人推銷棺材差唔多，唔比人打都算執到，然後我走訪了他們的分店，發現銷售人員大多HEA做，完全唔識SELL野同埋當你無到，自己坐係到唔使叫個客坐，呢個主要我覺得有兩個原因，第一係本身SALES知道產品根本指望可以賣得出，第二個係佢地本身唔專業，經過親身感受，我認為第二個原因居多，也唔排除係第一個問題衍生出來的，所以我都無乜感覺，我淨係知道如果由我去做的話，至少我客戶服務方面一定要比佢地優勝，就係咁，我好可能會去做下。

        賣呢一種無需求可言既產品真係難到爆，至少我自己都唔會比錢去消費本身已經免費既產品，即係相等於有一日你返工返學坐電梯既時候，大廈管理員問你收返一百幾十月費先可以用的話，你應該會嘈到佢拆天或者根本唔會理佢講乜，情況大概係咁，所以即使我自己銷唔去產品亦唔會覺得係自己既錯，非戰之罪也。 講返七千蚊月薪可以做乜先，回歸基本步，減去我每月既必須支出，大概淨返四千一個月，一年約五萬元儲蓄，真係少到無朋友，看來需要使出一些財技來加速呢個資本發展，唔係真係靠份工，聽到乞兒得，至於點搞法，仲要諗諗。

情人節感想

        過左一個情人節，你問我有冇花幾百元買一札花和幾百元食一頓飯，答案當然沒有，這好比自己投資一樣，如果你自己投資的哲學和生活並不相同，很明顯自己並不是率性而行，這樣很辛苦吧，如果辛苦才能有財務由，這樣有錢都沒有意義吧，我認為投資和生活一樣，既要有目標亦都要舒服，不然我認為你不要逆自己的性情而行，遲早發癲。

        講返情人節，其實札花可以話係表白又好，或者方便說話一點吧，不過為什麼不在平日送呢，平日送可能比今天送出更能節省，不過那些女兒心事誰人知呢，平時三百六十四天不好也沒有問題，只要今天做得好就可以了，世事認真奇妙。還有為什麼不在昨天或者明天晚上才吃套餐，一定要今天晚上吃呢，今天吃又比平時貴了一至兩倍，值不值得真是見人見致，不過很多女兒們都希望今天就是要人有我有，咁先會開心，看來當價值投資者和核心愛情觀真是源出一澈，沒有什麼分別。太多人流於形式和現面，核心那一層根本沒有太多人理會，結果將是根基不好，進而影響往後的發展。

        似乎有太多野並不能以金錢衡量，有些時候金錢的多少反而是其次，更重要的是時機和意義，投資我想差不多都有相同的見解，有時候賺得少要比可能賺得多更強，因為當巿場進入瘋狂的時候，買入股票賺的機率很多，可是被斬殺的機會亦都相若，在此情況之下持有定期存單和定息投資應該還更理想，又再一次證明有時賺錢反而唔重要，唔好失去錢更會重要。

        前排經歷一個調整巿，左諗右諗固然唔好，但因乜事左諗右諗肯定心中有數，如果你五十元買進長實，有乜好諗，跌就跌反正本死無大害，可是對於一百三十元買進的人，有乜辦法可以唔諗，即係話買入的時機和價位極之重要，重要到足以左右你自己能否長期持有的關鍵地位，所以如果下一次再有一堆現金在手，但又沒有好的標的買進，不妨就持有現金，即使巿場大吹美國又印錢的時候，你都吹唔漲就可以了，始終吹風是支持不了高估值的，遲早會跌，急不在於一時。

2011年2月12日投資者週記

        昨晚偷懶無出文章，所以今日出一篇長篇補足，本週正是不平凡的一週，幾乎日日都唔見錢，我相信好多人都會有呢一種感受，問題在於現在是調整時間還是股災先兆，依我之愚見，此永遠是調整，因為已經說過很多股票都已經是高位了，估值相對於價值已經大部份存在溢價，在此一狀況之下，調整就是必會發生之事，所以就不足怪了。當然，高估值向下調整到適當水平是理所當然的，但低估值的股票向下調整，為我們價值投資人締造了一個更好的買進基會，絕對值得考慮沽出高估值股票換入低估值股票，前題是兩家公司都乎合價值投資的標準而且相對價值而言換馬是更理想的選擇，若然滿足的話，我認為換馬更好。因為高估值股票調整後也可以是高估值，相對於低估值股票而言也是相當之高，所以假如大巿持續調整的話，換碼後的傷害和進攻機會應該更多。不過大部份情況之下，反彈力道最先見的是高估值的股票，所以基於此一出發點考慮，大部份人都會不捨得賤沽賤換，反而是不斷向下溝貨，我承認沒有那一種方法是最好的，現在是思索自己最成功的是出現在什麼時間的好機會，因為我自己獲得最豐厚利潤是出現在賤沽賤換的情況，所以此一方法最令我覺得舒服和安心，你也應該考慮一下自己憑什麼而成功。

        換馬的考慮大概如此，還有不應該經常想著自己買進的價格是多少而導致不捨得於買入價位下沽出，很多人會是如此思考的，導致了為保住手上的昔日光輝而捨棄了更多的好機會，何必呢，在我的投資組合管理軟件內，並沒有買入價一欄的存在，這樣做避免了我自己不捨得沽出，而更多的在於關心公司本質，現價相對內含價值，以及投資組合的整體表現，而不是個股。我認為買進價格唯一值得思考的時間是在買進的時候，買進了以後那個買入價幾乎和你不會有任何關係，所以我不明白為什麼會有這麼多人標示自己的買入價相對於現價的升幅，有什麼意思呢，可能在於個股來看是非常優秀，可是整體而言由於買進力度不足而導致對整個組合出現幾乎沒有重大變動的升幅，意義又何在呢，這點我不明白。還有關注組合整體表現絕對比個股更重要，假如你自己本身持有10%的股票上升了100%，可是持有30%的股票下跌了30%，得出來的結果是什麼呢，可想而知整體性的重要性絕對大於個股。

        本週出現最重大的事件，對於我來說幾乎是中國的貨幣總量和九倉供股的消息，前者大家可以到人民銀行的網頁八卦一下，或者你會發現事情並不如巿場所想，另外重點說一下九倉供股的信息，幾乎每一次九倉供股出現後都是整體巿場見頂前後的時間，吳生的眼光非常之銳利，你可能會想供股大股東都有必要出錢，所以並不存在賣股票的嫌疑，但事實上資金還是控制在會德豐的手裏，只不過是從左袋流到右袋罷了，有什麼分別，反而小股東可能被迫削弱了持股比重或者真金百銀注入九倉比大股東享用，總之供股絕對是股票過高的重要信號，這樣看準沒錯，除非本身公司並沒有什麼舉債的能力這又另當別論，但以九倉的身價，借一百億又有什麼難度，但既然大股東認為賣股票比借錢的資金成本更低，我又有什麼理由反對呢，巿場應該見頂了，我是這樣想。還有恆隆之前也配股了，事實證明陳生的眼光也是非常厲害的，即使現在透過恆隆集團在場內增持旗艦都有數圍。

        三月份會是業績潮，到時候期望大巿會有一度回暖的跡象，我更期望我的持股會有意想不到的好情況公報吧，但觀乎最近的業績，我認為要有大驚喜比較難，除非增加派息，否則股價都難以有進一步突破。未來之路將是非常嚴厲和無情的，尤其中國存款利率比很多股票更吸引之時，很難想象巿場會有什麼好表現，除非群眾又發揮多一次瘋狂的想法吧，否則我並不看好。

投資這回事

        你會否為今天股票下跌了2%而感到不高興嗎，你會否因為今天股票升了2仙而欣喜若狂嗎，金融海嘯你的回報率是多少，往後的兩年裏的每一年又如何，今年開首兩個月不到的時間又發生什麼事情，以上問題應該問一問自己，你投資應該關心的是什麼事情。什麼叫賺和什麼叫虧損在於你在什麼時間和什麼呎度去量度，幾本上到目前為止我不知道這問題應該如何回答才較為正確，是較為正確而不是絕對，因為即使你帳面上獲利了也可能是一名輸家，因為你也許敗給了通脹或其他因素。我認為投資獲利的較正確說法是做正確的事，有時即使賬面虧損沽出，但正確的決策也許會令你將來也再次獲利。所以這個問題倒不便多說，還是由各位由心出發好了。

        投資世界是一個非常殘酷無情的遊戲，或者可以說是終生職業，因為你永遠不會知度明天過後會發生什麼事情，本來今天完好無缺，但一夜過後可能變成人間煉獄，誰知曉巿場發生什麼事情呢，另外投資也不應該定性一個時間來量度所謂的升跌幅，今年獲利100%，但下年你又損失50%，你得到了多少呢，與其沉醉於美好的回億之中，倒不如認認真真地做好每一個決策吧，永遠要做正確的事情，即使暫時虧損，只有正確才能挽救投資者免於苦難，而盲目將會付出沉重的代價。

        有時候你在不對的時間做了一個錯誤的決策也許得出來的結果是正面的，但這個錯誤將會區使你走入更深層次的錯誤，後果將是萬劫不復，在錯的時間做對的決定也許錯誤了，但其實時間過去後將會獲得正面回報，所以我強調永遠要做正確的事，即使在好和壞的時間裏。當然為了彌補在決策時間上對決策質量的影響，每一次決策前都應該好和壞的情況也要假設，然後在每次執行後都反覆修正決策，充分利用結果和當初預期的對照達到較好的決策效果。

        我們得承認自己不是神，總沒有可能在任何巿場都能夠有好的表現，既然如此，犯下錯誤也是不可避免的事情，但犯了錯誤並沒有什麼問題，問題在於問題發生了後你能否察覺到問題的存在，而正視之並修正，否則的話我認為再經過N個不同的金融風暴你也不會修成正果。也許科斯托蘭尼說得好，投機是做一百次決定而最後獲得五十一次的勝利。