如果男人賣女裝

        今日好好笑，有人打電話叫我去INTERVIEW一份賣高級女裝既工作，我當然得啖笑然後一口拒絕，第一我毫無時代觸角，第二對服裝毫無興趣，叫我點做先，還有係女裝，你唔覺得奇怪我會覺得好奇怪，首先我的而且確係男仔，另外顧客除非係變態那一類，好肯定係女性顧客居多，如果整個男SALES，你係女仔你會唔會覺得奇怪先，無啦啦有條麻甩佬幫你拿衫同埋叫你去邊到邊到換，嘩，真係想嚇死人，而明顯地我覺得幫我JOB HUNT個條友第一無諗過人地間野係乜野同埋需要乜野類型既人選，隨便對DATABASE見我有APPLY SALES同埋對方要求售貨員就硬套叫我去INTERVIEW，唉，咁做野真係唔會有進步，仲要問我點解唔去見，大佬，唔好浪費我同埋對方既寶貴時間，好嗎。

        講返轉頭，其實銷售都係幾有爭議的一個空間，不同既店需要不同類型性格既人去匹配，例如同樣做女裝，如果係做D闊太既生意，靚仔或者型男應該會比一個姐姐仔SALES更受歡迎，但如果做普通檔次OL或者少女系衣服，你放個男人係到相信好多女仔都唔會敢走入來睇野或者買野，呢個就係講求入型入格的行業。還有你認為一個SALES要專業的時候，其實也不必然，有些闊佬財大氣粗以為自己乜都識，你SELL野時應該扮到好無知，比佢入你兩句然後不斷好似大疊銀紙塞入你袋既時候，呢位顧客可能感覺到仲HIGH，然後你仲要奉承兩句話佢真係見多識廣不吝賜教，有如醍醐灌醒如沐春風，即使你幾無知甚至乎無SELL過野，佢都會幫襯你買返一兩件，因為佢得到佢需要既野。噢，看來銷售真係好似心理拉鋸多於產品或服務上的供求。

        要做好銷售基本上你要基本產品知識和服務態度是最重要，但有些時候你不能永遠顧客都是上帝，適當的時候你要權威性地去挑戰他，或者大到佢無聲出，有些時候你越係無知越有著數。記得我那時做鋁窗，那個客人話我地個D係大陸貨不堪入目，我即時挑戰性還擊他手上的手機也是大陸貨，點解你仲用，然後傾下傾下人地覺得你都幾有POINT於是就落左單啦，另外係銀行做野，得閒哄下D師奶仔話佢地係靚女後生女咁，不知幾冧，見我幾生鬼都轉經紀變左我既客。銷售嘛，就係如斯奧妙。